१५ असार, काठमाडौं । भुवन केसी नेपाली चलचित्र क्षेत्रका एक ‘पावर हाउस’ मानिन्छन् । पहिले नायकका रुपमा र पछि निर्माताको रुपमा उनले चलचित्र क्षेत्रमा राम्रै दबदवा बनाए । अहिले भुवनका छोरा अनमोल केसी नम्बर १ नायकका रुपमा स्थापित छन् ।
कुनै समय भुवन केसी विवाद र स्क्यान्डलका पर्यायजस्तै थिए । तर, अहिले उनी निकै बदलिएका छन् । खासगरी छोरा अनमोल चलचित्र क्षेत्रमा उदाएपछि भुवनले आफूलाई ‘कन्ट्रोभर्सी’हरुबाट टाढा राख्न खोजिरहेका छन् । मिडियासित बोल्दा निकै सतर्क हुँदै बोल्छन् ।
अनलाइनखबरसँग दुई घन्टा लामो संवादमा पनि भुवनले निकै तौलेर बोले । धेरै प्रश्नहरुको आदर्शवादी उत्तर दिए । कतिपय प्रसंगहरुमा खुल्दै खुलेनन् । आफ्नो वास्तविक उमेरसमेत बताएनन् । यद्यपि, आफ्नो पारिवारिक जीवनका केही नयाँ तथ्यहरु उनले खुलासा गरे । खासगरी सुष्मिता केसीसितको डिभोर्स प्रसंग आउँदा उनी भावुक देखिए ।
भुवनसितको संवाद उनको हल्काफुल्का विषयबाट यसरी सुरु भयो :
तपाईंको उमेर सोध्न सक्छु ?
आई एम ४० प्लस ।
ठ्याक्कै भन्न मिल्दैन ?
नमिल्ने त होइन, तैपनि किन खोलिहाल्नु । आर्टिस्ट भएकाले उमेर भनिहाल्न अलि गाह्रो लाग्दोरहेछ ।
मैले १० वर्षको उमेरमा तपाईंको फिल्म साइनो हेरेको थिएँ । अहिले ४० वर्ष लागेँ । तपाईं त ६० वर्ष पुग्न लाग्नुभयो होला भन्ने अनुमान गरेको थिएँ ।
डेफिनेट्ली । मेरो छोरा हिरो भइसक्यो । तीन छोराछोरीमा अनमोल त कान्छो हो । ठूलो छोरा र छोरी अमेरिकामा छन् । धेरैले उनीहरुलाई देख्नुभएको छैन । सो द्याट.. म्याचुअर्ड त भइसकेँ । यू क्यान गेस माई एज । कति वर्षको जस्तो देखिन्छु ?
मैले हेर्दा त ४५/४६..
हो । त्यस्तै नै हो ..हा…हा… ।
भनेपछि राजेश हमालभन्दा तपाईं कान्छो ?
उहाँको ठ्याक्कै उमेर थाहा भएन । तर, हामी धेरै फरक छैनौं होला । उमेरका हिसाबले समकालीन नै हौं । फिल्म इन्डस्ट्रीमा चाहिँ उहाँ ८/१० वर्ष पछि आउनुभयो ।
एक समय तपाईंको कपाल झरेर तालु खुइलिन लागेको देखिन्थ्यो । पछि फेरि झपक्कै भयो, कसरी ?
मैले यूएस गएर हेयर ट्रान्सप्लान्ट गराएको हुँ ।
कहिले गराउनुभएको ?
पहिलोपटक २०/२० वर्ष अगाडि नै हो । ‘करोडपति’ फिल्म प्रदर्शनका लागि अमेरिका गएका बेला । तर, एकपटक मात्र गरेर नहुने रहेछ । तीनपटकको कोर्स हुँदोरहेछ । मैले तीनपटक गराइसकेँ ।
हेयर ट्रान्सप्लान्ट त निकै महंगो हुन्छ क्यारे, कति खर्च गर्नुभयो ?
खर्चिलो हो । सायद अरु प्रोफेसनमा भएको भए कपाल झरेर फरक पर्दैनथ्यो होला । तर, हाम्रो प्रोफेसनमा लुक्स पनि त चाहियो । दर्शकले फिल्ममा हेर्दा जस्तो देख्छन्, रियालिटीमा पनि त्योभन्दा धेरै फरक पाए भने निराश हुन्छन् । ‘हिरो’ जस्तो देखिनैपर्यो । त्यसैले सबै कुरा मेन्टेन गर्नुपर्छ ।
कपाल रोप्न कति खर्च लाग्यो ? भन्न मिल्दैन ?
भइगो नभनौं । धेरै लाग्यो । अहिले त अलि सस्तो भएको होला । नेपालमै पनि आएको छ भन्ने सुनेको छु ।
भनेपछि अब भुवन केसी बुढो हुँदासम्म पनि टाउको चाहिँ उर्बर नै रहने भयो ?
आई डन्ट नो । लेट्स होप । अहिलेसम्म चाहिँ मज्जासित पलाएको छ ।
तपाईंको लाइफ स्टाइल एकदम लापरवाहीपूर्ण देखिन्छ । न जिम गर्नुहुन्छ, न खानपिनमा नियन्त्रण छ । यसका बाबजुद फिट देखिनुको रहस्य के हो ?
हो । मैले जिम रेगुलर गर्दिनँ । कहिलेकाही दुई-तीन दिन ट्राई गर्छु, त्यसपछि अल्छी लाग्छ । लेजी छु । गरेको भए राम्रो हुन्थ्यो होला । अरुलाई गर्न सल्लाह दिन्छु ।
जिम नगर्ने, मनपरि खाने गर्दा पनि भुँडी किन नलागेको ?
यो चाहिँ म गड गिफ्ट नै मान्छु । कहिलेकाहीँ हल्का बढ्छ, फेरि आफैं घट्छ । मेरो उमेरका प्रायः सबै साथीहरुको पुट्ट भुँडी लागेको छ । उहाँहरु के खान्छस् हँ भन्नुहुन्छ । मैले त खानपानमा केही पनि सावधानी अपनाएको छैन । जे पनि खान्छु । हेल्थ पनि ठिकठाक छ । यसलाई भगवानकै कृपाको रुपमा लिएको छु ।
तपाईले जुँगा पछिल्लो समय कहिले खौरनुभएको थियो ?
अहिलेसम्म कहिल्यै काटेको छैन । र, भविष्यमा पनि काट्दिन । यदि मैले जुँगा काटेँ भने तपाईंले मलाई चिन्नुहुन्न । पहिले त मेरा जुंगाका फ्यान नै धेरै थिए ।
तपाईंले एउटा रोमान्टिक हिरोको छवि बनाउनुभयो र आफ्नो समयको सफल हिरो पनि बन्नुभयो । तर, आफ्ना कमजोरीहरु सुधार्ने कहिल्यै प्रयास गर्नुभएको देखिएन । जस्तो कि सुरुदेखि पछिसम्म फिल्ममा तपाईंको डान्स निकै दयनीय देखिन्छ । किन यो पक्षलाई नजरअन्दाज गर्नुभएको ?
मलाई डान्स भनेपछि पहिल्यैदेखि फिटिक्कै नआउने । फिल्मको सुटिङमा जाँदा डान्सको पार्ट आउँदा दिक्क लाग्थ्यो । डान्स गर्न नपरे हुन्थ्यो जस्तो लाग्थ्यो । सुधार्ने कोशिस पनि गरिनँ । गरेको भए हुने रहेछ । हुन त अहिले पनि गर्दा हुन्छ । तर, टीनएजमा त गरिएन, अब के गरिएला ।
तपाईंलाई डान्स गराउँदा नृत्य निर्देशकको पनि टाउको दुख्थ्यो होला नि ?
हो, उहाँहरुलाई दुःख हुन्थ्यो । त्यसैले मलाई अत्यावश्यक अवस्थामा मात्रै नचाउनुहुन्थ्यो । त्यो पनि सजिलो स्टेपहरु मात्र । नत्र हल्लिएर, कुदेर काम चलाउथेँ । तर, उहाँहरु के भन्नुहुन्थ्यो भने भुवन केसीको डान्स कमजोर भए पनि उसको एक्सप्रेसन र मुस्कान नै काफी छ । त्यसैमा दर्शक फिदा हुन्छन् । यद्यपि, अहिले सोच्दा नाच्न पनि जानेको भए सुनमा सुगन्ध हुन्थ्यो होला जस्तो लाग्छ ।
डान्स गर्दा सबैभन्दा गाह्रो कुन गीतमा लाग्यो ?
मैले सबैभन्दा बढी नाचेको भनेको साइनो फिल्मको ‘आमैले भन्थे धाराको पानी’ गीतमा हो । त्यो गीत सुन्दै म डराएको थिएँ । किनकि रमाइलो खालको लोकलयको गीत थियो । रक्सीको सुरमा मज्जाले नाच्नुपर्ने खालको । मैले शान्ता (नेपाली) दिदीलाई भनेँ कि यो त मलाई गाह्रो पर्छ होला । त्यसपछि उहाँले मलाई तिमीलाई कस्तो नाच्न आउँछ देखाउ त भन्नुभयो । आफ्नै पाराको डान्स देखाइदिएँ । अनि उहाँले मेरो त्यही नाच हेरेर मैले गर्न सक्नेखालको स्टेप सोच्नुभयो र सिकाउनुभयो । त्यो गर्न पनि निकै गाह्रो पर्यो । तर, त्यो गीत धेरैले मन पराइदिनुभयो ।
हालैमात्र आफैंले बनाएको फिल्म क्याप्टेनमा पनि त छोरासँगै नाच्नुभएको छ । कत्तिको गाह्रो भयो ?
यो पनि मेरो लागि ठूलो च्यालेन्ज थियो । नाच्ने त भनियो, तर आफूलाई आउँदैन । त्यसमाथि निरुता सिंह र आफ्नै छोरासित नाच्नुपर्ने । हल्लिएर मात्रै पुग्दैनथ्यो । त्यसैले घरमा आफैंले गीत बजाएर प्राक्टिस गरेँ । ५/६ दिन यसरी प्राक्टिस गरेर त्यत्तिको नाचेको हुँ । मलाई त सगरमाथा उक्ले बराबर भयो ।
तपाईं पिकनिक-पार्टीहरुमा पनि नाच्नुहुन्न ?
नाच्छु, तर आफ्नै पाराले । फिल्ममा जस्तो यस्तै स्टेप भन्ने हुँदैन नि त । हल्लिने हो । झुम्ने हो ।
तर, हिरो भनेपछि त गज्जबको डान्सको अपेक्षा गर्छन् नि त सबैले ?
मेरा साथीभाइदेखि दर्शक सबैलाई थाहा छ कि भुवन केसी डान्सिङ हिरो होइन । त्यसैले मबाट त्यस्तो अपेक्षा गर्नुहुन्न । मेरो विशेषता भनेको अभिनय हो । म अभिनयमा बढी मिहिनेत गर्छु ।
डान्स मात्र होइन, तपाईं त फाइटमा पनि कमजोर है ?
डान्सभन्दा फाइट चाहिँ तैबिसेक गर्छु । डान्सजस्तो गाह्रो फाइट गर्न लाग्दैन । हो, शिव श्रेष्ठ, निखिल उप्रेतिहरु जस्तो खत्रा गर्न सक्दिनँ । तर, साह्रै झुर पनि हुँदैन । करोडपति, नेपाली बाबु, म तिमीबिना मरिहाल्छुमा एक्सन पनि राम्रै गरेको छु ।
करोडपतिमा बाइक स्टन्ट पनि देखाइएको छ । गाडीमाथिबाट बाइक उडाएको दृश्य आफैंले गर्नुभएको हो कि स्टन्टम्यानले ?
एकदम आफैंले गरेको हुँ । म बाइकको सोखिन पहिलेदेखि । स्कुल पढ्दादेखि नै बाइक चलाउँथे । कलेजमा पनि बाइक लिएर जान्थेँ, जब त्यतिबेला काठमाडौंमा बाइक चलाउनेहरु निकै थोरै थिए । बाइक स्टन्टमा रुचि थियो । त्यसैले मेरै कन्सेप्टमा त्यो दृष्य राखिएको हो ।
डर लागेन यस्तो जोखिम मोल्न ?
हावा तालमा उडाएको होइन । मैले चार महिना प्राक्टिस गरेको थिएँ । फूल कन्फिडेन्स भएपछि मात्रै सुटिङ गरेको हुँ । बाइकको सिटमाथि उभिएर फनन घुमाउने, जम्प गर्ने गर्थेँ ।
डान्सबाहेक तपाईंलाई सुटिङ गर्न गाह्रो लाग्ने अरु दृश्य के हो ?
डान्स मात्रै हो । अरु सिनमा समस्या छैन । खासगरी इमोसनल खालका सिन त म एकदम मुडमा गर्छु । कतिपटक सुटिङमा आँशु नै खसेको छ ।
तपाईंले धेरै फिल्ममा रोमान्टिक हिरोको रुपमा खेल्नुभयो । त्यसैले रोमान्स किङको उपमा पनि पाउनुभएको छ । सुरुसुरुमा चाहिँ हिरोइनसँग अन्तरंग दृष्य दिँदा कतिको लाज लाग्थ्यो ?
त्यतिबेला अहिले जस्तो धेरै अन्तरंग सिन हुँदैन्थे । अंगालो मार्ने, काखमा लिने, र गालामा किससम्म खाने हो । मलाई त्यस्तो लाजको अनुभव भएन ।
फिल्ममा हिरोइनलाई किस गरेको दृष्य सुटिङ गर्दा हिरोलाई कति मज्जा आउँदो हो भन्ने पनि धेरै दर्शकले सोच्छन् । यस्ता दृष्यको छायांकनमा तपाईं कति रोमाञ्चित बन्नुहुन्छ ?
भनिहालेँ, त्यतिबेला अहिलेको जस्तो डिप किसिङ हुँदैनथ्यो । यद्यपि, रोमान्टिक सिनहरु त हुन्थे । तर, त्यसमा मज्जा लिने स्थिति चाहिँ हुँदैन । किनकि वरिपरि निर्देशक र प्राविधिकहरु हुन्छन् । क्यामराले खिचिरहेको हुन्छ । कसरी कलात्मकरुपमा त्यो सिन दिने भन्ने ध्याउन्न हुन्छ, ताकि भल्गर नदेखियोस् । हाम्रो उद्देश्य दर्शकलाई त्यो दृश्यबाट रोमाञ्चित बनाउने हो, आफैं रोमाञ्चित हुने होइन । हाम्रा लागि त त्यो अभिनयको एउटा हिस्सा मात्र हो ।
धेरै हिरोइनहरुसँग खेल्नुभयो । तपाईंको सबैभन्दा राम्रो केमेस्ट्री कोसित मिल्थ्यो जस्तो लाग्छ ?
जति हिरोइनसँग खेलेँ, सबैसँग मेरो जोडी जमेको छ । सुरुमा तृप्तिसँग धेरै हिट फिल्म खेलेँ । सम्झना, साइनो, कुसुमे रुमाल जस्ता फिल्मपछि हाम्रो जोडी हिट भयो । पछि कृष्टि केसी, गौरी मल्ल, करिश्मा मानन्धरदेखि निरुता सिंहसम्म मेरो जोडी हुनुभयो । सबैसँग काम गर्दा रमाइलो भयो । अँ जल शाह त मेरो फेभरेट हुनुहुन्थ्यो । उहाँसँग ‘नेपाली बाबु’मा खेलेको छु ।
त्यतिबेला अहिलेजस्तो मिडियाको बाढी थिएन । थोरै पत्रपत्रिका थिए । तैपनि तपाईंका धेरै स्क्यान्डलहरु आए । खासगरी मिडियाले तपाईंलाई ‘प्ले व्वाई’ का रुपमा चित्रित गरेका छन् । आफ्नो यो छविमा सन्तुष्ट हुनुहुन्छ ?
विभिन्न नायिकाज्यूहरुसँग मेरो नाम जोडेर गसिपहरु त्यतिबेला पनि आउँथे । तर, त्यो वास्तविकतामा आधारित हुन्थेन । मलाई बाहिर प्ले ब्वाई भनिएको देख्दा अहिले पनि अचम्म लाग्छ । मेरो क्यारेक्टर त्यस्तो हुँदै होइन । मैले रोमान्टिक फिल्महरु धेरै खेलेकाले यस्तो छवि बनेको हुन सक्छ । यसमा मेरो चित्त दुखाइ छैन ।
एउटा कुरा, पहिले दर्शकले फिल्ममा जसले जस्तो क्यारेक्टर गर्छ, वास्तविकतामा पनि त्यस्तै होला भन्ठान्थे । जस्तो फिल्ममा भिलेन खेल्ने व्यक्ति खराब नै होला भन्ने हुन्थ्यो । फिल्ममा खत्रा फाइट गर्ने वास्तविकतामा पनि बलशाली होला भन्ने ठानिन्थ्यो । म फिल्ममा बढी रोमान्टिक रोल गर्ने भएकाले दर्शकले वास्तविकतामा पनि त्यस्तै सोच्नुभएको होला ।
त्यतिबेलाकी एक नायिकाले यतिसम्म भन्नुभएको थियो कि भुवन केसी नभएको भए नेपाली सिनेमा इन्डष्ट्रीमा धेरै नायिकाहरु भर्जिन हुन्थे । उहाँले यत्तिकै त भन्नुभएको हो त ?
उहाँलाई किन त्यस्तो लाग्यो, मलाई थाहा भएन । तर, म त्यस्तो हुँदै होइन । केटी साथीहरु त भइ नै हाल्छन् । कहिलेकाहीँ घुम्न पनि गएँ होला । तर, फिल्म इन्डष्ट्रीमा कुनै हिरोइनसित पनि मेरो त्यस्तोखालको सम्वन्ध भएन । हो, मेरा लेडिज फ्यानहरु धेरै हुनुहुन्थ्यो ।
त्यतिबेला इन्टरनेट मोबाइल थिएन । लेडिज फ्यानहरुको पत्र कत्तिको आउँथ्यो ?
चिठी र पोष्टकार्ड त कति आउँथे कति । पढेर नसकिने । सुरु-सुरुमा त सबै पढ्थेँ । तर, पछि साध्य नै भएन ।
चिठीको जवाफ पनि पठाउनुहुन्थ्यो ?
सुरुसुरुमा कसै कसैलाई पठाएँ । पछि त पढ्न पनि नभ्याउने स्थिति भयो । र्यान्डम्ली छानेर दुईचारवटा पढ्थेँ ।
ती चिठीपत्रहरु अहिले पनि छन् कि नष्ट गर्नुभयो ?
लामो समयसम्म त जोगाएर राखेको थिएँ । तर, पछि ठाउँ भएन । फाल्नुपरो ।
फोहोरमै पठाइदिनुभयो ?
कागजवालालाई दिएर पठाएँ ।
फिल्म इन्डष्ट्रीमा कुनै पनि हिरोइनसित तपाईंको अन्तरंग सम्वन्ध भएन ?
अन्तरंग भन्नाले ?
प्रेम परेको वा पर्ला-पर्ला जस्तो भएको ?
त्यस्तो त सुष्मिताजीसँग मात्रै हो । उहाँसित त बिहे नै भयो । अरु कसैसित रिलेसनसिपमा रहिनँ ।
तर, प्ले ब्वाईको छवि भएको हिरोले यस्तो भन्दा पाठकले पत्याउलान् र ?
यही त मलाई अचम्म लाग्छ । कुन ‘वे’ ले किन प्ले ब्वाई भनिएको हो, थाहा छैन । पत्रकारलाई किन यस्तो लेख्नुभएको हो भनेर प्रश्न पनि गर्दिनँ । उहाँहरुले लेख्दालेख्दै स्थापित नै भयो । तर, यसमा मलाई दुखेसो छैन ।
एउटा फिल्मको सुटिङका क्रममा चर्चित नायिकाको फ्रक नै उचालेर चिहाउनुभएको भनेर ठूलै स्क्यान्डल भएको थियो नि ?
त्यो मैले आफूखुशी गरेको होइन । सुटिङमा सबै कुरा निर्देशकको निर्देशनबमोजिम हुन्छ । त्यसमा मलाई मुछ्नु नै बेकार थियो ।
तपाईंले निर्देशनभन्दा बाहिर गएर त्यो काम गर्नुभएको होइन ?
होइन । भनिएकै त्यही थियो, त्यो दृष्य गीतमै समावेश गरिएको छ ।
तर, त्यस्तो भद्दा सिन गर्दिनँ भन्न सक्नुहुन्थ्यो नि ?
मलाई त्यस्तो भल्गर जस्तो लागेन ।
एक समय तपाईंलाई एड्स लागेको भनेर पनि अफवाह फैलिएको थियो नि । खासमा कसले फैलाएको थियो ?
आइ डन्ट नो । मलाई जहाँसम्म लाग्छ, एउटा गाईजात्रे पत्रिकाले लेखेको हुनुपर्छ । अनि त्यसैलाई लिएर मेरो खुट्टा तान्न चाहनेहरुले अफवाहको विषय बनाए । हल्ला चर्कै भएपछि मैले एउटा पत्रिकामा यो कुरा प्रूफ गर्नुभयो भने एक लाख इनाम दिन्छु भनेर अन्तरवार्ता दिएँ । त्यो मेरो इमेज बिगार्न गरिएको ठूलो षडयन्त्र थियो ।
कोटेश्वर काण्ड चाहिँ के हो ?
के कोटेश्वर काण्ड ?
आफ्नी श्रीमतीलाई घुमाउन लगेको भनेर एक व्यक्तिले तपाईंको गाडी कोटेश्वरमा रोकेर तपाईंलाई कुटपिट गरेको समाचार आएको थियो त ?
त्यो सबै वाहियात हो । त्यस्तो केही भएकै छैन ।
हावा नचली पात हल्लिन्छ र ?
अहँ, केही भएकै छैन । यहाँ हुँदै नभएका कुरालाई पनि स्क्यान्डल बनाइदिन्छन् ।
फोटो पनि त आएको थियो ?
भनिहालेँ नि । केही भएकै छैन । त्यो फेक न्यूज थियो । साथी हो, चिनजानको हिसाबले भेटघाट हुनु स्वभाविक हो ।
हेलमेटले हानेको होइन उसोभए ?
होइन । सबै फेक न्यूज हो ।
तपाईले पहिले खेलेका धेरै फिल्मरुमा एउटै खालको डिंगो लगाएको देखिन्थ्यो, किन ?
हो । मैले डिंगो बुटलाई आफ्नो ‘लक्की चार्म’ मान्थें। भयो के भने मैले डिंगो लगाएर खेलेका केही फिल्म लगातार हिट भए । त्यसपछि एउटा फिल्ममा डिंगो नलगाई खेलेको फ्लप भयो । त्यसपछि मैले डिंगो अपरिहार्य मान्न थालेँ । हरेक फिल्ममा निर्देशकलाई दबाव दिएर भए पनि डिंगो लगाएको सिन राख्न लगाउँथेँ । सपना फिल्ममा गाउँले युवकको रोल थियो । त्यसमा दौरा सुरुवालमा पनि डिंगो लगाएको छु ।
त्यतिबेला तपाईं र नायक शिव श्रेष्ठको प्रतिस्पर्धा चर्को थियो भनिन्छ । तपाईंहरुबीच प्रतिस्पर्धाको भावना कत्तिको हुन्थ्यो ?
हाम्रो सम्वन्धत एकदम सुमधुर थियो । शिव श्रेष्ठ एक्सन फिल्ममा जम्थ्यो, म रोमान्टिटक फिल्ममा । हाम्रो धार नै अलग भएकाले हामीले एक-अर्कालाई प्रतिस्पर्धी नै सोचेनौं । बरु कतिपय फिल्ममा एक अर्काको नाम सिफारिस गरेका छौं । शिवले लगानी गरेको फिल्म ‘चिनो’ मा मैले खेलेको छु । मैले बनाएको ‘सपना’ मा शिवलाई खेलाएको छु । यतिसम्म कि सपनामा दुई हिरोको भूमिकामध्ये शिवलाई नै एउटा रोज्न दिएको थिएँ ।
त्यो बेलाको फिल्म बनाउने शैलीसँग अहिलेको शैली तुलना गर्दा के फरक पाउनुहुन्छ ?
प्रविधिमा अहिले हामी धनी छौं । त्यो बेला त नेपालमा धेरै उपकरण नै थिएन । क्यामरा बम्बैबाट मगाउँथ्यौं । गीत रेकर्डिङ गर्न बम्बई नै जानुपथ्र्यो । फिल्म सुटिङ गर्दाखेरि पनि अहिले जस्तो आफूले गरेको अभिनय स्कृनमा कस्तो देखियो भनेर हेर्ने मौका हुँदैनथ्यो । एकैचोटि हलमा लागेपछि हेर्ने हो । त्यसैले सच्याउने अवसर थिएन ।
अर्काे कुरा, त्यतिबेला फिल्मको पूर्वतयारी कम हुन्थ्यो । मुख्य कलाकारलाई पनि स्कृप्ट दिइँदैनथ्यो । फिल्मपूर्व वर्कसप हुँदैनथ्यो । एकैचोटि सुटिङ स्पटमा गएर डाइलग घोक्ने हो । यस्तो कुराहरुमा अहिले बढी प्रोफेसनल छ । तर, कथावस्तुको हिसाबले चाहिँ पहिले बढी राम्रो थियो जस्तो लाग्छ ।
अब तपाईंको निजी जीवनतर्फ जाउँ । तपाईंले पहिलो बिहे फिल्ममा आउनुभन्दा अगाडि नै गर्नुभयो । विजया केसीसँग कसरी बिहे भएको थियो ?
हाम्रो एरेन्ज म्यारिज नै भएको हो । यद्यपि दुवैले एक-अर्कालाई राम्ररी चिनेका थियौं ।
भेट कसरी भएको थियो ?
फिल्ममा आउनुभन्दा अगाडि मैले ६ महिनाजति यति ट्राभलमा टुर अफिसरका रुपमा काम गरेँ । त्यतिबेला म त्रिचन्द्र क्याम्पसमा आइए पढ्थेँ । पार्ट टाइम जागिर थियो । विजयाले पनि त्यहाँ काम गर्नुहुन्थ्यो । त्यहीँ भेट भयो । घुलमिल भइयो । एक-अर्काको घरमा आउजाउ भयो । मेरो परिवारले उहाँलाई मन पराउनुभयो । अनि बिहेको प्रस्ताव परिवारबाटै गरियो । उहाँको परिवारले स्वीकार्नुभयो । त्यतिबेला २४ वर्षको थिएँ ।
उहाँ त टेलिभिजनमा अंग्रेजी समाचार भन्नुहुन्थ्यो भन्ने सुनेको थिएँ…
बिहेपछि यति ट्राभल छोडेर उहाँले नेपाल टेलिभिजनमा अंग्रेजी समाचारवाचिकाको काम गर्नुभएको हो । त्यस्तै ८ महिना जति मात्रै गर्नुभयो होला । त्यसपछि एभरेस्ट होटलमा ज्वाइन हुनुभयो । त्यसैबाट तालिमका लागि जापान जानुभयो । जापानपछि अमेरिका जानुभयो र त्यहीँ सेटल हुनुभयो ।
तपाईंहरुको सम्वन्धचाहिँ कसरी टुट्यो ?
सम्वन्ध टुट्यो कसरी भन्ने ? अहिले पनि राम्रो सम्वन्ध छ ।
तर, डिभोर्स त उहिल्यै भइसकेको होइन ?
अहँ, भएको छैन । हामी डिभोर्स गरेर अलग भएकै होइनौं । खाली भौगोलिकरुपमा टाढा भएका हौं । उनी अमेरिकाबाट नेपाल फर्किन चाहिनन् । म नेपाल छोडेर अमेरिका जान चाहिनँ । त्यत्ति हो ।
उहाँसँग अहिले पनि सम्पर्क हुन्छ ?
एकदम हुन्छ । फोनमा पनि कुरा हुन्छ । २-३ वर्षमा नेपाल आइरहनुहुन्छ । म अमेरिका गएको बेलामा पनि भेट हुन्छ । सम्वन्धमा कुनै किसिमको तितोपना छैन । छोरी काजोलको बिहे उहाँले र मैले मिलेर नै गराएका हौं ।
अब अलग भयौं भन्ने चाहिँ कहिलेबाट भयो ?
अलग भएको त अहिले पनि लाग्दैन । अहिले पनि हाम्रो राम्रो सम्वन्ध छ । उहाँ अमेरिकामा रेस्टुरेन्ट बिजनेस गर्नुहुन्छ । त्यो चटक्क छोडेर नेपाल आउन नसक्नु भएको मात्र हो ।
भन्नाले सँगै नबसे पनि अझैसम्म तपाईंहरु श्रीमान-श्रीमतीकै रुपमा हुनुहुन्छ ?
एस, एस । हामीले मनमुटाब भएर डिभोसए गरेर छुट्टएिका होइनौं ।
तपाईं अमेरिका जाँदा अथवा उहाँ नेपाल आउँदा सँगै बस्नुहुन्छ ?
भेटघाट हुन्छ । घरैमा त बसेको छैन । उहाँतर्फबाट भएका छोरा विवेक र छोरी काजल अमेरिकामै बस्छन् । छोराको पनि घर छ, छोरीको पनि घर छ । तीनैजना सेटल छन् । आ-आफ्नो विजनेस छ । म प्राय छोराकहाँ बस्छु ।
छोराछोरी त पहिले तपाईंसँगै थिए होइन ?
हो, पहिले मसँगै थिए । एसएलसीपछि अध्ययनका लागि आमासँग अमेरिका गएका हुन् । उतै सेटल भए ।
उनीहरुलाई फिल्ममा किन ल्याउनुभएन ?
उनीहरुकै इन्ट्रेस्ट नभएर हो । मैले विवेकलाई त सोधेको थिएँ । तर, खासै रुचि देखाएन । मैले दवाव पनि दिइनँ ।
यदि पहिलो पत्नीसँग डिभोर्स गर्नुभएको होइन भने त तपाईंले गरेको दोस्रो बिहे त गैरकानूनी भयो नि ?
यसमा मैले वकिलहरुसँग बुझ्दा कानूनअनुसार तीन वर्ष श्रीमान-श्रीमती सँगै नबसेपछि कानूनले अर्को बिहे गर्न इजाजत दिँदोरहेछ ।
सुष्मिताजीले बिहेअघि पहिलो श्रीमतीसँग डिभोर्स गर्न तपाईंलाई दबाव दिनुभएन ?
मैले उहाँलाई पनि कानूनी कुरा सम्झाएपछि कुनै ठूलो विषय मान्नुभएन ।
सुष्मिताजीसँग चाहिँ कसरी भेट भएको हो ?
विजयाजी अमेरिका गएको धेरै समय भइसकेको थियो । त्यही बीचमा एउटा फिल्ममा सँगै काम गर्ने कुरा हुँदा सुष्मिताजीसँग भेट भयो । पछि उहाँले त्यो फिल्म गर्नुभएन । तर, हामी साथी बन्यौं, र प्रेममा पनि पर्यौं ।
कति वर्ष अफेयर चल्यो ?
चल्यो होला, १/२ वर्ष ।
बिहे धुमधामले गर्नुभयो कि ?
सामान्य तवरले गरियो । मन्दिरमा दुवै पक्षका नजिकका आफन्तहरु हुनुहुन्थ्यो ।
दोस्रो बिहे पनि नटिक्नुको कारण चाहिँ के हो ?
हामी एक-अर्कासँग त्यति ह्याप्पी भएनौं । सँगै बसेर भन्दा छुट्टएिर खुशी हुन्छौं भने छुट्टअिौं भन्ने भयो ।
तर, डिभोर्स गर्नेजस्तो ठूलो निर्णय सजिलै त लिइँदैन नि ?
डिभोर्स गर्न त कसले बिहे गरेको हुन्छ र ? यो परिस्थितिको उपज हो । नचाहेर पनि हुँदो रहेछ । यसमा धेरै आन्तरिक कुराहरु छन्, जुन बाहिर ल्याउनु उपयुक्त हुँदैन । तर, एक-अर्कामा अन्डरस्ट्यान्डिङ नभएपछि समाजलाई देखाउनका लागि मात्रै सँगै बस्नु उपयुक्त हुन्थेन । त्यसैले कानूनबमोजिम अलग भयौं ।
अनमोल सानै थिए होला । यस्तोमा त बच्चाको पहिलो हक आमालाई हुन्छ । उनी तपाईंसँग कसरी रहे ?
हो, अनमोल ५ वर्षको मात्रै थियो । कानूनीरुपमा आमाको पहिलो हक लाग्थ्यो । तर, अनमोल सानैदेखि मसित बढी झ्याम्मिन्थ्यो । माया त दुबैले उत्ति नै गर्थ्याै , तर पनि मलाई बढी पछ्याउँथ्यो । त्यसैले सुष्मिताजीले बच्चा मैले लग्दा पनि आपत्ति छैन भन्नुभयो ।
तपाईंहरु डिभोर्स गरेर छुट्टएिपछि अनमोलले घरमा आमा नदेख्दा कत्तिको खोज्थे ?
उसकै कारण मलाई निकै गाह्रो पनि भएको थियो । डिभोर्स गरेको २/३ वर्ष त उसलाई हामीले थाहा पनि दिएनौं ।
त्यस्तो कसरी सम्भव भयो ? आमा त खोज्थे होला ।
डिभोर्सपछि मैले अनमोललाई होस्टलमा राखेँ । हामी दुवैले उसलाई केही समय यो कुरा थाहा नदिने समझदारी गरेका थियौं । त्यसैले शुक्रबार/शुक्रबार दुवैजना एकैसाथ होस्टलमा भेट्न जान्थ्यौं । स्कुलमा प्यारेन्ट्स डे र अन्य कार्यक्रमरु हुँदा पनि दुवैजना जान्थ्यौं ।
तर, छुट्टीमा घर आउँदा उसले आमा खोज्थ्यो । त्यसपछि छोराकै खातिर फेरि हामीले एकपटक सँगै बस्ने प्रयास गर्यौं । १/२ वर्ष सँगै बसियो, पतिपत्नीको रुपमा नभएर साथीको रुपमा । तर, त्यसरी बस्नु पनि व्यवहारिक भएन । सम्वन्ध सुधार हुन नसकेपछि फेरि छुट्टीयाैं । अलि ठूलो भएपछि अनमोलले पनि बुझ्दै गए ।
एकल पिताका रुपमा छोरा हुर्काउन तपाईंलाई कत्तिको गाह्रो भयो ?
गाह्रो त हुने नै भयो । बच्चाका लागि बुवाको र आमाको आफ्नो-आफ्नो महत्व हुन्छ । आमाले दिने स्याहार बुवाले दिन सक्दैन । त्यसैले मैले जति प्रयास गरे पनि आमाको अभाव पूर्ति गर्न सक्दिनथेँ । यही कुराले मलाई मानसिकरुपमा पनि निकै अस्थिर बनायो । मेरो फिल्म करिअर प्रभावित भयो ।
तर, आज तपाईंलाई भन्छु, यो डिभोर्स हुनुमा मेरो हात थिएन । डिभोर्स सुष्मिताजीले माग्नुभएको हो । डिभोर्सपछि पनि सँगै बस्ने प्रस्ताव मैले राखेको थिएँ । म अन्तिमसम्म पनि सम्वन्धलाई जोगाएरै लैजान चाहन्थेँ । कमसेकम छोराका लागि । तर, एकहातले ताली बज्दैन ।
यसको अर्थ, उनलाई मात्रै दोष दिन खोजेको होइन । केही कमी-कमजोरी मबाट पनि भए होलान् । अहिले पनि अफसोच लाग्छ । यदि हामी नछुट्टएिको भए अनमोलका लागि राम्रो हुन्थ्यो । उसले दुवै प्यारेन्ट्स घरमा पाउँथ्यो । तर, पनि मेरो तर्फबाट चाहिँ भत्केको घर समेट्न अधिकतम प्रयास गरेको हुँ । प्रयास गर्दागर्दै पनि सफल भइनँ ।
तपाईं अन्य युवतीसँग लागेर उहाँले डिभोर्स माग्नुभएको थियो कि ?
बिल्कुल गलत हो । म हाम्रो दाम्पत्य सम्वन्धमा पूर्ण बफादार थिएँ । परिवारको सम्पूर्ण उत्तरदायित्व बहन गरेको थिएँ ।सुष्मिता गइसकेपछि मलाई निकै गाह्रो भयो । म भित्रैदेखि हल्लिएको थिएँ । मन पनि स्थिर थिएन । अब कताबाट लाइफ सुरु गर्ने हो जस्तो भयो । अनमोल सानै थियो । फिल्म बनाउन पनि मन लागेन । खेल्न पनि मन लागेन । सन्न्यास नै लिएँ एक-दुई वर्ष जति
अनमोल ठूलो भएपछि तपाईंहरुबीच समझदारीको वातावरण बनाउने प्रयास गर्नुभएन ?
ठूलो भएपछि उसले मलाई तपाईंहरु सँगै बसेको राम्रो हुन्छ भन्थ्यो । उसले मम्मीलाई पनि यही कुरा भन्थ्यो । उ हामी सँगै भएको नै हेर्न चाहन्थ्यो । तर, समय निकै घर्किसकेको थियो ।
छोरालाई भेट्न सुष्मिताजी कत्तिको घर आउनुहुन्छ ?
उहाँ आउनुभएको छैन । भेट्न मन लागेका बेला उहाँले अनमोललाई बोलाउनुहुन्छ । अनमोलले मलाई सोध्छ । म उसलाई भन्छु कि मसित सम्वन्ध टुटे पनि उनी तिम्री आमा हुन् । तिमी जुनसुकै बेला आमालाई भेट्न जान सक्छौ, मलाई सोधिरहनु पर्दैन । अहिले पनि टाइम-टाइममा भेटिरहन्छ ।
चाडबाडमा के गर्नुहुन्छ ?
दशैंमा अनमोल आमाको हातको टीका लगाउन जान्छ । ऊ आमासित जाँदा म ह्याप्पी हुन्छु ।
तपाईंको चैं उहाँसित कत्तिको सम्पर्क हुन्छ ?
दोस्रोपटक अलग्गिएपछि एकपटक पनि भेट भएको छैन । फोनमा पनि कुरा भएको छैन ।
कागजीरुपमा सम्वन्ध तोडिए पनि भावनात्मक सम्वन्ध त टुटिहाल्दैन होला नि । अहिले उहाँप्रति तपाईंको फिलिङ्स कस्तो छ ?
डेफिनेट्ली फिलिङ्स छ । अहिले पनि म उहाँलाई मिस गर्छु । मलाई धेरै सुख-दुःखमा साथ दिएकी छिन् । सबै कसरी भुल्न सक्छु । सबैभन्दा ठूलो कुरा उनले मलाई छोराका रुपमा अनमोल रत्न दिएकी छन् । यसका लागि म उनीप्रति सदा ऋणी छु ।
तपाईंको जीवनमा तेस्रो स्त्रीका रुपमा जिया केसीको कसरी प्रवेश भयो ?
उहाँ मेरो एकदम राम्रो साथी हो । बेस्ट फ्रेन्ड हो । सुष्मिता गइसकेपछि मलाई निकै गाह्रो भयो । म भित्रैदेखि हल्लिएको थिएँ । मन पनि स्थिर थिएन । अब कताबाट लाइफ सुरु गर्ने हो जस्तो भयो । अनमोल सानै थियो । फिल्म बनाउन पनि मन लागेन । खेल्न पनि मन लागेन । सन्न्यास नै लिएँ एक-दुई वर्ष जति । अब गर्दिनँ भनेको थिएँ । तर, जिन्दगी जसरी पनि अगाडि धकेल्नै पर्ने रहेछ । म एकदम अप्ठेरो अवस्थाबाट गुज्रिरहँदा जिया जस्ती साथी पाएँ ।
उहाँसँग कसरी भेट भयो ?
उनी पनि फिल्म इन्डष्ट्रीमा थिइन् । एउटा पार्टीमा हाम्रो भेट भयो । मलाई उनी राम्रो लाग्यो । साथी हुँदै गयौं । उनलाई पनि मेरो केही नेचरहरु मन पर्यो होला । त्यसैले हामी धेरै नजिकको साथी भयौं । धेरै राम्रो रिलेसन छ । घरमा आउने-जाने छ । सिनेमा सँगै बनाइरहेका छौं । अनमोललाई पनि उनले माया गर्छिन् । सपोर्ट गर्छिन् । सि इज भेरी नाइस ।
लिभिङ टुगेदर बस्नुभएको कति भयो ?
सँधै सँगै त बसेको छैन । उहाँ आफ्नो घरमा पनि बस्नुहुन्छ । कहिलेकाहीँ मकहाँ आउनुहुन्छ, बस्नुहुन्छ । वी ह्याभ भेरी गुड रिलेसन । हाम्रो फेमिलीसित पनि जियाजीको राम्रो सम्वन्ध छ ।
विवाह चाहिँ किन नगर्नुभएको ? कि गरिसक्नुभयो ?
गरेका छैनौं । सोच्दैछौं हामी । हेरौं, के हुन्छ । लेट्स सी । किनभने मेरो त दुईचोटि घर बिग्रिसकेको छ । फेरि पनि…
उहाँको परिवारले विवाह गर्न सल्लाह वा दबाव दिनुभएको छैन ?
हाम्रो परिवार उनीसित खुशी हुनुहुन्छ । उहाँको परिवारले पनि अब्जेक्सन गरेको छैन । विवाहको विषयमा हामीले परिवारमा कुरा गरेका छैनौं ।
त्यसो भए अहिलेसम्म तपाईंहरु प्रेमी-प्रेमिकाका रुपमा मात्रै हुनुहुन्छ ?
हो, डेफिनेट्ली हो । हामी सँगै पनि बस्छौं । तर, हामीले बिहे गरिसकेका छैनौं । हामी योजना बनाइरहेका छौं । हेरौं के हुन्छ । म के बुझ्छु भने, मेरो दुईचोटि बिहे भयो । कत्ति मान्छेको धुमधामले बिहे भएर केही समयमै डिभोर्स भएको देख्छु । कतिचाहिँ समाजले के भन्ला भनेर मन नमिलेर पनि सँगै बसेको देख्छु । मेरो विचारमा बिहे नगरे पनि यदि तपाईंहरु खुशी हुनुहुन्छ भने इट्स नट ब्याड ।
जियाजीले चाहिँ बिहे गरौं भन्नुहुन्न ?
उहाँको भित्री कुरा उहाँले नै भन्नुहोला । कुनै दिन भेटेर प्रश्न गर्नुहोला । मलाई सोध्नुहुन्छ भने हयाप्पी हुन सबैभन्दा महत्वपूर्ण चिज मैले के बुझेँ भने देखावटीभन्दा मनको सम्वन्ध धेरै ठूलो रहेछ । बाजा बजाएर बिहे गरेर मात्रै ह्याप्पी हुन सकिँदैन । तर, बिहे नगरी पनि दिलको नाता राम्रो छ, तपाईं ह्याप्पी हुनुहुन्छ भने त्यो महत्वपूर्ण जस्तो लाग्यो । ह्याप्पिनेस सबैभन्दा ठूलो कुरा हो ।
तपाईंले बनाउने फिल्ममा हिरोइनको छनोट जियाजीले गर्नुहुन्छ भन्ने सुनिन्छ, कति सत्य हो ?
दुईजना नायिका उहाँले छनोट गर्नुभएको हो । डि्रम्समा साम्राज्ञीजीको सिफारिस उहाँले गर्नुभएको थियो । त्यसो त हामीले धेरैजनाको अडिसन लिएका थियौं, तर त्यसलाई बाहिर ल्याएनौं । साम्राज्ञीले पनि अडिसन दिनुभएको थियो । जियाजीले उहाँलाई सिफारिस गरेपछि मैले अनमोलसँग पनि सल्लाह गरेँ । उसले पनि ओके गर्यो । यस हिसाबले साम्राज्ञीलाई हिरोइन बनाउने श्रेय जियाजीलाई जान्छ ।
अर्कोचाहिँ क्याप्टेनमा उपासना सिंह ठकुरीलाई गाउँले युवतीको रोलमा सुहाउँछ भनेर जियाजीले सल्लाह दिनुभएको हो । तर, उहाँको सल्लाहले मात्रै नभएर हामीले पनि अडिसन लिएर छनोट गरेका हौं ।
जियाजी आफैंले चाहिँ तपाईंको फिल्ममा हिरोइन बन्न रहर गर्नुभएको छैन ? कि तपाईंले नखेलाउनुभएको हो ?
उहाँलाई खेलाउन नचाहेको पक्कै होइन । यदि स्कृप्टमा सुट हुनुभयो भने उहाँलाई नराख्ने कुरै आउँदैन । हामीले अहिले अनमोललाई हेरेर नायिका छनोट गर्नुपर्ने हुन्छ । भविश्यमा कुनै फिल्ममा जियालाई मिल्ने रोल निस्क्यो भने पक्कै खेल्नुहुन्छ ।
तपाईंहरुको सम्वन्धबारे अनमोलको दृष्टिकोण के पाउनुभएको छ ?
अनमोल एकदम समझदार, डिसेन्ट व्यक्ति हो । कम उमेरमै पनि परिपक्व छ । उसले मेरो कुनै पनि कुरामा हस्तक्षेप गर्दैन । जियाले अनमोललाई एकदम माया गर्छिन् । सपोर्ट गर्छिन् । अनमोलले मलाई भन्छ कि हजुर जे गर्दा ह्याप्पी हुनुहुन्छ, त्यही गर्नुस् । अनमोल मात्रै होइन, अमेरिकामा रहेका छोराछोरीहरु विवेक र काजोलले पनि सधैं यही भन्छन् कि ड्याड वी आर अल्वेज विथ यू, आफ्नो खुशी हेरेर निर्णय लिनुस् । आजकलका बच्चाहरु धेरै समझदार छन् । हामीलाई सिकाउने भइसके ।
तपाईंको छोरो नभएको भए अनमोल आजको स्थानमा हुनुहुन्थ्यो ?
उसलाई फिल्म इन्डष्ट्रीमा आउन मेरो हात होला । तर, यसमा आफूलाई स्थापित गराउन र दर्शकको माया पाउन त मैले गरेर हुने होइन । यो उसकै बलबुँताको कुरा हो । अरु पनि स्टार किडहरु छन् नि इन्डष्ट्रीमा । तर, प्रतिभा र मिहिनेतले मात्रै यस क्षेत्रमा टिकिन्छ ।
तपाईंले फिल्म उद्योगमा लामो समय काम गरेर जुन स्थान बनाउनुभयो, अनमोलले छोटो समयमै आफूलाई उछिनेको जस्तो लाग्छ ?
मलाई आफूले चलचित्रमा ठूलो स्थान बनाएँ भन्ने नै लाग्दैन । ३५ वर्षमा सयभन्दा बढी फिल्म खेलेँ, तर पनि आफूलाई सिकारु नै सम्झिन्छु । अनमोल त भर्खर आएको हो । सिक्ने क्रममा नै छ । उसले म सुपरस्टार वा मेगास्टार भनेर कहिल्यै घमण्ड गरेका छैनन् । अरुले उसलाई विभिन्न उपाधि दिएका छन् ।
एउटा उसको विशेषता चाहिँ के छ भने अनमोल पैसाको पछि दौडिँदैन । पैसा जति अफर गरे पनि स्त्रिmप्ट चित्त नबुझिकन फिल्म गर्दैन । यसमा मभन्दा बढी उ परिपक्व छ । नत्र पैसा बटुल्न कसलाई मन नलाग्ला ।
त्यो पनि उसको जस्तो अल्लारे उमेरमा कसैले पचासौं लाखको अफर लिएर आउँदा कले रिजेक्ट गर्थ्यो । यसरी एकदमै विचार पुर्याएर मात्रै फिल्म छनोट गर्ने भएकाले पनि उसले आज यो स्थान हासिल गरेको हो जस्तो लाग्छ ।
तर, तपाईंले अनमोललाई फिल्म साइन गर्न दबाव दिने गरेको सुनिन्छ । अनमोललाई फिल्म खेलाउन तपाईंसँगै डिल गर्नुपर्छ रे ?
यो सबै अफवाह हो । बाबुको नाताले उसलाई गर्ने सपोर्ट आफ्नो ठाउँमा छ, तर नचाहिँदो हस्तक्षेप कहिल्यै गर्दिनँ । उसले कुनै स्कृप्टको अफर आयो भने मलाई सुनाउँछ । म सल्लाह दिन्छु । तर निर्णय उसैले लिने हो । मेरो कुनै भूमिका हुँदैन ।
अनमोलले चाह्यो भने अहिले एक वर्षमा १० वटा फिल्म खेल्न सक्छ, तर मुस्किलले वर्षमा एउटा खेलिरहेको छ । त्यो उसकै निर्णय हो । बाबुले छोराको प्रशंसा गरेको राम्रो नसुनिएला, तर उसलाई हरेक फिल्ममा दर्शकलाई मैले केही नयाँ दिनुपर्छ भन्ने हुट्हुटी छ ।
